Bakies se Mediasentrum tops in Gauteng vir die Tweede keer!!
Die Gautengse Onderwysdepartement wys jaarliks die beste mediasentrums in Gautengse skole aan.
Tydens 2009 se ‘School Library Seminar’ het Bakenkop die eer ontvang om vir die tweede keer die toekenning genaamd “Winner of the School Library Award” vir die jaar 2008 te ontvang. Die toekenning is in die kategorie vir laerskole en is tydens‘n spoggeleentheid waar Gauteng skole verteenwoordig word, deur mev. Tina de Villiers in ontvangs geneem. Dieselfde toekenning is ook in 2007 aan Bakenkop se mediasentrum toegeken. Hierdie jaar is dit gedeel met Glenstantia Primary.
Juf. Rejeanne skryf dit veral daaraan toe dat lees deurlopend en op verskillende interessante maniere by die Bakies bevorder word vanuit die madiasentrum, die rekenaarsentrum (gesamentlik bekend as die inligtingsentrum) en vanuit die klaskamer. Daar word ook groot moeite gedoen met die aankoop van boeke en die samewering van die beheerliggaam ten opsigte van die begroting getuig van die groot waarde wat daar aan lees vir plesier sowel as inligting geheg word.
Bakenkop se mediasentrum beskik oor ongeveer 7800 boeke wat fiksie, verhale, naslaanwerke en vakliteratuur insluit. Daar is ook 'n groot voorraad oudiovisuele media wat prente, skyfies, videokasette, oudio-kasettte, transparante, multi-media pakkette, rekenaar cd's en musiek cd's insluit. Oudiovisuele apparaat word ook aan onderwysers uitgereik vir klasgebruik.
Leerders besoek die Mediasentrum tydens skoolure vir onderrig van mediavaardighede, om navorsing te doen in hulle verskeie leerareas en ook om boeke uit te neem. Die sentrum is oop gedurende pouses en ook naskool tot 15:00. 'n Uiters bekwame onderwyseres-bibliotekaresse is voltyds aan diens. Leerders word ook hier die geleentheid gegun om Medialeiers te wees. Gereelde leesweke word gehou en statistieke toon dat die Bakies ywerige lesers is!
